Шүүхийн шийдвэр гүйцэтгэх ерөнхий газрын харьяа 407 дугаар нээлттэй, хаалттай хорих анги нийгэмшүүлэх ажлын үр нөлөөг дээшлүүлэх зорилтын хүрээнд “Ухаарлын уянга” соёл урлагийн арга хэмжээг нийт хүмүүжигч нарын дунд амжилттай зохион байгууллаа.Тус анги 1996 онд үйл ажиллагаа явуулж байсан “Ухаарлын уянга” амьд хөгжмийн хамтлагийг сэргээн байгуулахтай холбогдуулан соён гэгээрүүлэх чиглэлийн арга хэмжээг үе шаттай зохион байгуулж байгаагийн нэг нь энэхүү бага наадам юм. Урлагийн бага наадам нь нийт хүмүүжигчдийн авьяас чадварыг нээн илрүүлж, урлагаар дамжуулан нийгэмшүүлэх ажлын үр дүнг дээшлүүлж, эерэг уур амьсгал бүрдүүлсэн арга хэмжээ боллоо.Урлагийн бага наадмын хөтөлбөрийн дагуу гоцлол дуу, хамтлаг бүжиг, уран уншлага, гоцлол хөгжим, хамтлаг дуу гэсэн таван төрлөөр нийт хүмүүжигч нар өөрсдийн бэлдсэн үзүүлбэрээр өрсөлдсөн юм.Энэхүү арга хэмжээнд зочин шүүгчээр Шүүхийн шийдвэр гүйцэтгэх ерөнхий газрын “Соёмбо” чуулгын хөгжимчин, ахмад Б.Зоригоо, гоцлол дуучин, ахмад Н.Эрдэнэсүх, бүжигчин, дэд ахлагч У.Сүхбат, Налайх дүүргийн соёлын ордны менежер Д.Батцэцэг, лимбэний багш Ц.Баярсайхан нар ажиллалаа.
